کبھی تم نے یہ سوچا ہے

کبھی تم نے یہ سوچا ہے
جو ہم نے خواب دیکھے ہیں
اگر سب ٹوٹ جائیں تو
ہماری روح کے اندر اندھیرا پھیل سکتا ہے
اور اس گہرے اندھیرے میں
کبھی ہم کھو بھی سکتے ہیں
سنو ایسا کبھی ہو تو مری یادوں کے
جنگل میں بھٹک کر عمر بھر جاناں کبھی 
ہلکان مت ہونا
کوئی اپنا نظر آئےتو اس کے ساتھ چل پڑنا
ذرا سی اس رفاقت میں
جو ہم نے خواب دیکھے ہیں
تم ان خوابوں میں مت رہنا
ضروری تو نہیں کہ جو کچھ ہم نے سوچا ہے
مقدر میں بھی لکھا ہو
یہاں اکثر وہی ہوتا ہے جو سوچا نہیں 
ہوتا
سنو تم جانتے ہو ناں مقدر ہم نہیں لکھتے
میری جاں وقت ہم کو بھی اگر اس موڑ پر لائے
کہ میرے ہاتھ سے تیرا اچانک
ہاتھ چھٹ جائے
ہمارا ساتھ چھٹ جائے
تو میرے ہجر میں خود کو کہیں جوگی نہ کر لینا
جدائی روگ ہے دل کو کہیں روگی نہ کر لینا
سنو میں تو مسافر ہوں
مسافر کے مقدر میں سفر ہی ہو تو اچھا ہے
مسافر جان کر میری سبھی یادیں بھلا 
دینا
مجھے دل سے مٹا دینا
کبھی باتوں ہی باتوں میں اچانک یاد آؤں
تو ذرا سا مسکرا دینا