ہم خوابوں کے بیوپاری تھے

ہم خوابوں کے بیوپاری تھے
پر اِس میں ہوا نقصان بڑا

کچھ بخت میں ڈھیروں کالک تھی
کچھ اب کے غضب کا کال پڑا

ہم راکھ لیے ہیں جھولی میں
اور سر پے ہے ساہوکار کھڑا

یاں بوند نہیں ہے دِیوے میں
وہ باج بیاج کی بات کرے

ہم بانجھ زمین کو تکتے ہیں
وہ ڈھور اناج کی بات کرے

ہم کوئی دِن کی مہلت مانگیں
وہ آج ہی آج کی بات کرے

جب دھرتی صحرا صحرا تھی
ہم دریا دریا روئے تھے

جب ہاتھ کی ریکھائیں چُپ تھیں
اور سُر سنگیت میں سوئے تھے

تب ہم نے جیون کھیتی میں
کچھ خواب انوکھے بوئے تھے

کچھ خواب سے جَل مُسکانوں کے
کچھ بول خبط دیوانوں کے

کچھ لفظ جنھیں معنی نہ مِلے
کچھ گیت شکِستہ جانوں کے

کچھ نِیر وفا کی شمعوں کے
کچھ پَر پاگل پروانوں کے

پھر اپنی گھائل آنکھوں سے
خوش ہو کے لہو چھِڑکایا تھا

ماٹی میں ماس کی کھاد بھری
اور نَس نَس کو زخمایا تھا

اور بھول گئے پِچھلی رُت میں
کیا کھویا تھا کیا پایا تھا

ہر بار گگن نے وہم دیا
اب کے برکھا جب آئے گی

ہر بیج سے کونپل پھوٹے گی
اور ہر کونپل پھل لائے گی

سر پر سایہ چھتری ہوگی
اور دھوپ گھٹا بن جائے گی

جب فصل کٹی تو کیا دیکھا
کوئی درد کے ٹُوٹے گجرے تھے

کوئی زخمی خواب تھے کانٹوں پر
کچھ خاکستر سے کجرے تھے

اور دُور اُفق کے ساغر میں
کوئی ڈوبتے ڈولتے بجرے تھے

اب پائوں کھڑائوں دھول بھری
اور جِسم پے جوک کا چولہ ہے

سب سنگی ساتھی بھید بھرے
کوئی ماسہ ہے کوئی تولہ ہے

اِس طاق میں وہ ، اُس گھات میں یہ
ہر اوٹ ٹھگوں کا ٹولہ ہے

اب گھاٹ نہ گھر ، دیوار نہ دَر
اب پاس رہا ہے کیا بابا

بس تن کی گٹھڑی باقی ہے
جا یہ بھی تُو لے جا بابا

ہم بستی چھوڑے جاتے ہیں
تو اپنا قرض چُکا بابا