جب ہم جڑتے ہیں!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اجاڑ موسموں میں
درخت سناٹوں کا پھل دیتے ہیں
تلوؤں پر سرد پتوں کا لمس
وجود میں
غارت گر لمحے اگاتا ہے
کالی چادروں میں لپٹے جھونکے
سینے کی دیواروں سے
زندگی گھسیٹ کر
مٹی پر ٹھٹھرنے کے لیے
چھوڑ دیتے ہیں
یہ لہریں کھائی ہوئی ریت
جو جنسی ابھاروں کی تشبیہہ بن گئی ہے
یہ دور تک پھسلتا آسمان
جو زندہ رکھ کر جینے نہیں دیتا
اور سینے کے دروازے کھلتے ہیں تو
جنگل بہتا ہوا
اس کے اندر بس جاتا ہے
یہ روح کاٹتی اداسی
یہ خلا در خلا
سب کچھ اکائی میں ڈھلتا ہے
بکھرے وجود کی اکائیوں میں
کچھ زندگی
کچھ مسرت
اور کچھ کمینگی
سینے کے دروازے پر
دستک دیتی ہے
No comments:
Post a Comment