محبت ذات ہوتی ہے
محبت ذات کی تکمیل ہوتی ہے
کوئی جنگل میں جا ٹھہرے، کسی بستی میں بس جاۓ
محبت ساتھ ہوتی ہے
محبت خوشبوؤں کی لے
محبت موسموں کا دھن
محبت آبشاروں کے نکھرتے پانیوں کا من
محبت جنگلوں میں رقص کرتی مورتی کا تن
محبت برف پڑتی سردیوں میں دھوپ بنتی ہے
محبت دل
محبت جاں
محبت روح کا درماں
محبت مورتی ہے
فضاؤں میں کسی کے ہاتھ سے گر چھوٹ جاۓ تو
محبت آبلہ ہے کرب کا
اور پھوٹ جاۓ تو
محبت روگ ہوتی ہے
محبت سوگ ہوتی ہے
محبت شام ہوتی ہے
محبت رات ہوتی ہے
محبت جھلملاتی آنکھ میں برسات ہوتی ہے
محبت نیند کی رات میں حسیں خوابوں کے رستوں پر سلگتے، جاں کو آتے رتجگوں کی گھات ہوتی ہے
محبت جیت ہوتی ہے
محبت مات ہوتی ہے
محبت ذات ہوتی ہے
Wednesday, March 9, 2016
محبت ذات ہوتی ہے
Subscribe to:
Post Comments (Atom)
No comments:
Post a Comment