جس سمت بھی دیکھوں، نظر آتا ھے کہ تم ھو

جس سمت بھی دیکھوں، نظر آتا ھے کہ تم ھو
اے جانِ جہاں! یہ کوئی تم سا ھے، کہ تم ھو
یہ خواب ھے، خوُشبو ھے کہ جھونکا ھے کہ پَل ھے
یہ دُھند ھے، بادل ھے کہ سایا ھے کہ تم ھو
دیکھو۔ یہ کِسی اور کی آنکھیں ھیں کہ میری
دیکھوں، یہ کِسی اور کا چہرہ ھے کہ تم ھو
یہ عُمرِ گریزاں، کہیں ٹھہرے تو یہ جانوُں
ھر سانس میں مجھ کو یہی لگتا ھے کہ تم ھو
ھر بزم میں موضوعِ سُخن دل زدگاں کا
اب کون ھے، شیریں ھے، کہ لیلا ھے کہ تم ھو
اِک درد کا پھیلا ھُوا صحرا ھے کہ میں ھوں
اِک موج میں آیا ھُوا دریا ھے کہ تم ھو
وہ وقت نہ آئے کہ دلِ زار بھی سوچے
اِس شہر میں تنہا کوئی ھم سا ھے کہ تم ھو
آباد ھم آشُفتہ سروں سے نہیں مقتل
یہ رسم ابھی شہر میں زندہ ھے کہ تم ھو
اے جانِ فراز! اِتنی بھی توفیق کِسے تھی
ھم کو غمِ ھستی بھی گوارا ھے کہ تم ھو