محبت اور امن کی تلاش میں

میں جا رہا ہوں
محبت اور امن کی تلاش میں
تم میرا انتظار کرنا
میں واپس ضرور آﺅں گا
جب میں واپس آﺅں گا
تو میرے کندھے پر
محبت کا پرندہ بیٹھا ہو گا۔
اور میری کشتی کے بادبان پر
امن کا نغمہ لکھا ہو گا
میں واپس کب آﺅں گا
یقین سے کچھ نہیں کہہ سکتا
ممکن ہے اس میں ایک زندگی لگ جائے
یا دو زندگیاں
میری سہولت کے لیے
تم اپنی زندگی کا ایک حصہ مجھے دے دو
میں یقین دلاتا ہوں
اس کا ایک لمحہ ضائع نہیں کروں گا
ضرورت سے زیادہ کہیں نہیں ٹھہروں گا
تم مجھ سے ایک وعدہ کرو۔
میں جو چیز جس حالت میں چھوڑ جاﺅں
اسے بہتر نہ کر سکو۔
تو مزید خراب بھی نہ ہونے دینا
ہواﺅں میں جتنا دھواں ہے
اسے بڑھنے نہ دینا
زمین میں جتنا زہر ہے
اسے وہیں روکے رکھنا
یہ بہت ضروری ہے۔
محبت کا پرندہ زندہ رکھنے کے لیے
اور میری کشتی کے بادبان پر
لکھا ہوا امن کا گیت
ہر لب پر منتقل کرنے کے لیے