کتنی بدل چکی ھے رُت

کتنی بدل چکی ھے رُت
جذبے بھی وہ نہیں رھے
دل پہ ترے فراق کے 
صدمے بھی وہ نہیں رھے
محفلِ شب میں گفتگو 
اب کے ہوئی تو یہ کُھلا
باتیں بھی وہ نہیں رھیں 
لہجے بھی وہ نہیں رھے
حلیے بدل کے رکھ دئیے 
جیسے شبِ فراق نے
آنکھیں بھی وہ نہیں رھیں
چہرے بھی وہ نہیں رھے
اس کا مہِ جمال بھی 
گویا غروب ھو چلا
اپنے وفورِ شوق کے 
چرچے بھی وہ نہیں رھے
ہوش و خرد گنوا چکے
خود سے بھی دور جا چکے
لوگ جو تیرے تھے کبھی
اپنے بھی وہ نہیں رھے
یہ بھی ھوا کہ تیرے بعد
شوق سفر نہیں رھا
جن پہ بچھے ھوئے تھے دل
رستے بھی وہ نہیں رھے