یہ جو رَنگ ہیں مِری ہمسفر

یہ جو رَنگ ہیں
مِری ہمسفر
مِری ذات کے یہ جو رَنگ ہیں
یہ اُمنگ ہیں
مِری شاعری۔۔۔مِری نغمگی کی ترنگ ہیں
جو میں سچ کہوں
مِری بے خودی کے یہ اَنگ ہیں
کسی اُجڑے دیار کے یہ ملنگ ہیں
مِرے غَم کے سامنے ڈھال ہیں، مِرے سنگ ہیں
میں لڑوں اگر
مِری جنگ ہیں
یہ معاملے
مِری ذات کے جو بیاں کروں
یہی سوچتا ہوں کہ حالِ دل بھی عیاں کروں
تو جلا کے دُکھ
سبھی غم کدوں میں دھواں کروں
جو نہیں کہا وُہ بیاں کروں
تو اگر کہے تو میں ہاں کروں
جو نہ ٹوٹے ایسی زباں کروں
تجھے پیش اپنی میں جاں کروں
مِرے لفظ میں، مِرے شعرمیں ، مِری نغمگی کے حصار میں
مِرے ہر ہُنر کے دیار میں
وُہ قلم میں ہیں
کبھی اُنگلیوں کے شَرار میں
کہیں قَول میں یا قرار میں
کسی ٹوٹتے ہوئے خواب میں ، کہیں رَت جگوں کی قَطار میں
کبھی ہَوش میں یاخُمار میں
مِرے خوں سے اُٹھتے فِشار میں
ہیں محبتیں
یہ محبتیں مِری زندگی کا وُہ خواب ہیں
ترے لب پہ جتنے بھی اَن کہے سے سوال ہیں
تو یہ اُن سبھی کاجواب ہیں
جو غلط ہوئے
تو میں ختم شد